Ancelotti premton besnikëri ndaj Brazilit: Mendoj që do të rinovoj!

Carlo Ancelotti po e përjeton pozitivisht aventurën në krye të përfaqësueses së Brazil, ndërsa Federata braziliane mbetet e kënaqur me rezultatet dhe ka nisur bisedimet për rinovimin e kontratës.

Vetë tekniku konfirmoi publikisht se dëshiron të vazhdojë bashkëpunimin dhe është i gatshëm të firmosë një marrëveshje të re deri në vitin 2030, duke theksuar se puna në Brazil i pëlqen shumë.

Kontrata aktuale e Ancelottit është e vlefshme deri në fund të FIFA World Cup 2026. Italiani mori drejtimin e pesë herë kampionëve të botës në maj 2025, duke u bërë trajneri i parë i huaj në historinë e tyre dhe njëkohësisht më i paguari. Në tetë ndeshje nën drejtimin e tij, Brazili regjistroi katër fitore, dy barazime dhe dy humbje, duke siguruar kualifikimin për Botërorin.

Ndërkohë, e ardhmja e Neymar mbetet e paqartë. Ylli brazilian nuk garanton praninë në Botëror dhe nuk përjashton tërheqjen nga futbolli pas përfundimit të kontratës me Santos në dhjetor 2026.