Anglia fiton mes vërshëllimave të tifozëve, Portugalia i nis me “manita” kualifikueset

Anglia ka debutuar me fitore në kualifikueset e Kupës së Botës 2026, pasi mposhti Andorrën 2-0 në “Villa Park”, Birmingham. Pavarësisht rezultatit, ekipi i Thomas Tuchel nuk tregoi lojë bindëse, duke marrë edhe vërshëllima nga tifozët gjatë ndeshjes.

Avantazhi erdhi në minutën e 25-të, kur një krosim i Noni Madueke u devijua nga mbrojtësi Christian Garcia, duke përfunduar në rrjetë për autogol. Në pjesën e dytë, Declan Rice vulosi rezultatin 2-0 me një goditje me kokë pas asistit të saktë nga Reece James (66’).

Ndërkohë, Portugalia e Roberto Martinez tregoi forcë në transfertën ndaj Armenisë, duke fituar 0-5 në Yerevan. Festën e hapi Joao Felix (9’), ndërsa Cristiano Ronaldo (20’) dyfishoi me golin e tij të parë në takim. Joao Cancelo (32’) e çoi rezultatin në 0-3, duke festuar në stilin e ish-shokut të skuadrës Diogo Jota.

Në pjesën e dytë, Ronaldo realizoi dopietën e tij personale me një goditje nga distanca (48’), ndërsa Joao Felix (60’) shënoi golin e dytë personal dhe të pestin për luzitanët. Portugalia e nisi në mënyrën më të mirë këtë fushatë, duke dërguar mesazh të qartë për rivalët.