Armando Sadiku ka vendosur t’i japë fund karrierës si futbollist profesionist në moshën 35-vjeçare. Ish-sulmuesi i Kombëtares shqiptare e ka bërë të ditur vendimin përmes një postimi emocionues në rrjetet sociale, duke mbyllur kështu një rrugëtim të gjatë në futbollin e luajtur.
“Faleminderit futboll! Do të më mungosh!”, shkruan Sadiku në mesazhin e tij të lamtumirës, duke i dhënë fund një karriere të pasur me eksperienca në disa kampionate të ndryshme.
Pas mbylljes së aventurës në fushën e blertë, ish-sulmuesi do të nisë një kapitull të ri në karrierën e tij, këtë herë jashtë saj. Sadiku do të marrë detyrën e drejtorit sportiv te klubi zviceran i Bellinzonës, duke vijuar të jetë pjesë e futbollit në një rol drejtues.
Gjatë karrierës së tij, Sadiku u aktivizua me disa skuadra shqiptare dhe të huaja. Pas eksperiencave me Gramozin dhe Elbasanin, ai luajti në kampionate si ato të Zvicrës, Polonisë, Turqisë, Spanjës, Bolivisë dhe Indisë, duke ndërtuar një profil ndërkombëtar.
Megjithatë, momenti më i veçantë i karrierës së tij mbetet goli i shënuar ndaj Rumanisë në Euro 2016. Ai realizim i dha Shqipërisë fitoren e parë në historinë e saj në një Kampionat Europian dhe shënoi golin e parë të kuqezinjve në një turne madhor të këtij niveli.
Me fanellën e Kombëtares, Sadiku regjistroi 38 ndeshje dhe 12 gola. Tashmë, ai nis një sfidë të re te Bellinzona, me synimin për të kontribuar në futboll nga pozicioni i drejtuesit sportiv.