Arsenal e feston fitoren në Napoli me… një picë

Arsenali e mbylli në mënyrën më të mirë transfertën e vështirë në Napoli. “Topçinjtë” triumfuan 1-0 në stadiumin Diego Armando Maradona, falë golit të Martin Ødegaard në minutën e 75-të, duke e nisur me tri pikë aventurën e re në Champions League.

Pas një paraqitjeje solide, skuadra e Mikel Artetës ruajti edhe një tjetër clean sheet, ndërsa David Raya ishte një nga protagonistët e mbrëmjes. Portieri spanjoll pati disa ndërhyrje të rëndësishme dhe, pavarësisht një momenti jo perfekt në fillim të ndeshjes, kontribuoi në suksesin e londinezëve.

Por pas vërshëllimës së fundit, Raya vendosi ta festojë fitoren në një mënyrë tipike italiane. Kamerat e Mediaset e kapën portierin e Arsenalit teksa largohej nga stadiumi me një picë në dorë. Një mënyrë perfekte për të mbyllur një mbrëmje të suksesshme në Napoli, përpara rikthimit në Londër, ku skuadra do të përgatitet për ndeshjen e radhës në Premier League.

Dhe ndoshta këtu mund të ketë pasur edhe pak “dorë” italiane nga Riccardo Calafiori, edhe pse mbrojtësi nuk e nisi ndeshjen si titullar. Në çdo rast, lojtarët e Arsenalit duket se nuk deshën të largoheshin nga Napoli pa shijuar një nga simbolet më të famshme të qytetit.