Arsenal “mbulohet me ar”/ Afro 140 milionë euro nga Champions, ja sa vlen trofeu

Arsenal po përjeton një sezon të jashtëzakonshëm në Champions League, jo vetëm në aspektin sportiv, por edhe financiar. Klubi londinez ka arkëtuar tashmë mbi 120 milionë paund (rreth 140 milionë euro) nga rrugëtimi drejt finales, ndërsa triumfi mund të sjellë edhe miliona të tjera.

Kualifikimi historik erdhi pas fitores 1-0 ndaj Atletico Madrid në gjysmëfinalen e kthimit në “Emirates Stadium”, falë golit vendimtar të Bukayo Saka. Tashmë londinezët presin finalen e madhe në Budapest.

Nga pikëpamja financiare, çdo skuadër që hyn në fazën e ligës përfiton një shumë bazë prej 18.62 milionë eurosh. Performanca e Arsenalit, që kryesoi grupin e tij, i ka siguruar klubit edhe 40.6 milionë euro të tjera shpërblime për rezultate, përfshirë 11 milionë euro vetëm për kalimin në fazën e 1/8-ave.

Sipas analizave financiare, klubi ka përfituar gjithashtu rreth 37 milionë euro nga i ashtuquajturi “value pillar” i UEFA-s, i lidhur me tregun televiziv dhe renditjen historike të klubeve në kompeticionet europiane.

Fitimet nuk ndalen këtu:

12.5 milionë euro për çerekfinalet

15 milionë euro për gjysmëfinalet

18.5 milionë euro për arritjen në finale

Në rast triumfi, skuadra e drejtuar nga Mikel Arteta do të përfitojë edhe 10.5 milionë euro shtesë: 6.5 milionë si bonus fitoreje dhe 4 milionë për kualifikimin në UEFA Super Cup 2026. Fituesi i kësaj të fundit merr edhe 1 milion euro ekstra.