Arteta: Të ndihmoj Tottenhamin? Nuk mundem, kam shumë punë në kopshtin tim!

Trajneri i Arsenalit, Mikel Arteta, ka thumbuar me ironi rivalët e përjetshëm të Tottenhamit, duke refuzuar të japë këshilla për të dalë nga kriza që po kalojnë.

Gjatë prezantimit të partneritetit të tij të ri me fushatën e testeve gjenomike të Bupa-s, tekniku spanjoll u pyet nëse kishte ndonjë sugjerim për Tottenhamin, që po përballet me një periudhë të vështirë.

Përgjigjja e Artetës ishte e shkurtër, por plot ironi, duke shkaktuar të qeshura.

“Kam frikë se nuk mund t’ju ndihmoj për këtë”, u shpreh trajneri i Arsenalit me buzëqeshje, përpara se të shtonte: “Kam mjaft gjëra për të rregulluar në kopshtin tim, faleminderit”.

Me këtë deklaratë, Arteta e bëri të qartë se nuk ka ndërmend të merret me problemet e rivalëve të qytetit, duke u përqendruar plotësisht te skuadra e tij.

Arsenali synon të vazhdojë të jetë protagonist në futbollin anglez, ndërsa trajneri spanjoll ka fituar vlerësime për punën e bërë që prej mbërritjes së tij në Londër.