Asllani i mbetet në “derë” Interit, pritet të largohet në formë huazimi

E ardhmja e Kristjan Asllanit mbetet ende për t’u zgjidhur në këtë merkato vere. Mesfushori shqiptar nuk duket se bën pjesë në planet e trajnerit të Interit, Cristian Chivu, ndërsa klubi zikaltër po punon për të gjetur një zgjidhje përfundimtare për të.

Interi është i gatshëm të shqyrtojë shitjen e Asllanit për një shifër rreth 10 milionë euro, ndërsa në tavolinë mbetet edhe formula e huazimit me të drejtë blerjeje.

Për 24-vjeçarin ka pasur interes nga disa klube, por pista më e fundit të çon sërish në Serie A. Sassuolo është një nga klubet që ka shfaqur interes për mesfushorin shqiptar, ndërsa më herët në garë ishte përmendur edhe Cagliari.

Klubi sard është kontaktuar me Interin për situatën e Asllanit, por kërkesa prej rreth 10 milionë eurosh është konsideruar e lartë.

Në muajt e fundit, emri i shqiptarit është lidhur edhe me një transferim jashtë Italisë. Në janar, Girona kishte kërkuar informacion për situatën e tij, duke e konsideruar si një alternativë për repartin e mesfushës. Së fundmi, interes për Asllanin ka shfaqur edhe Hull City në Angli.

Megjithatë, për momentin nuk ka një marrëveshje konkrete. Interi po vlerëson ofertat dhe formulat e mundshme të transferimit, ndërsa Asllani ka ende kohë për të përcaktuar destinacionin e tij të ardhshëm.