Aston Villa nuk përfiton nga ndalesa e Arsenalit, mundet nga Evertoni

Aston Villa humbi një mundësi të artë për t’u afruar me kreun e renditjes në Premier League, duke u mposhtur 1-0 në shtëpi nga Evertoni, në ndeshjen e vlefshme për javën e 22-të të kampionatit anglez.

Skuadra e Unai Emeryt nuk arriti të përfitojë nga barazimi i Arsenalit kryesues dhe nga humbja e Manchester Cityt në derbin ndaj Unitedit, duke u ndalur surprizueshëm përballë një Evertoni të organizuar mirë. Goli i vetëm i takimit u shënua në minutën e 59-të nga Barry, i cili ndëshkoi vendasit në pjesën e dytë.

Pavarësisht dominimit territorial, Aston Villa nuk gjeti zgjidhje për të thyer mbrojtjen kundërshtare dhe u detyrua të largohej pa pikë nga “Villa Park”. Me këtë humbje, Villa mbetet në kuotën e 43 pikëve, shtatë më pak se Arsenali në krye të tabelës.

Nga ana tjetër, Evertoni merr një fitore shumë të rëndësishme që e ngjit në 32 pikë, duke u pozicionuar në mesin e renditjes dhe duke hedhur një hap të sigurt drejt një sezoni të qetë.