Atalanta përmbysje spektakolare ndaj Lazios, Gjimshiti fiton derbin ndaj Strakoshës (VIDEO)

Atalanta pa frikë mund të cilësohet si skuadra e momentit në Itali dhe në Europë. Skuadra e Gasperinit vijon të dhurojë futboll të bukur javë pas jave, ndërkohë që nuk mungojnë dhe fitore. Viktima e radhës as më pak dhe as më shumë është Lazios, të cilën e mundën me përmbysje 3-2.

Dueli nisi i ndezur që në fillim, teksa De Roon e dërgoi topin gabimisht në rrjetën e portës së tij. Lazio mori zemër nga goli dhe përfitoi nga përgjumja e bergamaskëve për të shënuar edhe të dytin, pas një “perle” të Milinkovic-Savic. Vendasit gjithsesi do të zgjoheshin në fundin e pjesës së parë, duke rihapur ndeshjen me një gol të shënuar me kokë nga Gosens. Për t’u evidentuar dy shanse shumë të mira të shpërdoruara nga Gjimshiti.

Fraksioni i dytë foli e gjitha për Atalantën që luan vetëm në gjysmëfushën e bardhekaltërve. Nga loja e rrjedhshme do të vnte ehde goli i barazimit të Malinovsky-it, pas një perle të shënuar nga distanca, që ishte e pamundur të ndalej nga Strakosha. 10 minuta nga fundi Palomino do të realizonte me kokë, duke përfituar nga përgjumja e mbrojtjes së Lazios.

Në ndeshjen tjetër Roma fitoi 2-1 ndaj Sampdorias me dy gola të Dzekos që përmbysën golin e Gabbiadini. /R.Lika-Koha Jone/