Babai i Xhakës reagon ashpër: O ju të mjerë, a prisnit që Graniti t’u falte ndeshjen?

Babai i Granit dhe Taulant Xhakës, Ragipi, ka reaguar ashpër ndaj kritikave të bëra në adresë të djalit të tij pas ndeshjes së Zvicrës kundër Kosovës. Në një reagim publik, ai i quajti “shpifje dhe fyerje” komentet që pretendonin se Graniti nuk kishte dhënë maksimumin në përballje.

Ragip Xhaka u shpreh se sulmet ndaj djalit të tij janë të padrejta, duke kujtuar momentet kur Graniti dhe Taulanti kanë treguar gjithmonë krenarinë shqiptare në arenën ndërkombëtare:

“Kur tentoni të njollosni Granitin, në fakt po njollosni veten tuaj. Pse prisnit që ai t’ua falte lojën? Ai ka ngritur flamurin kuqezi me krenari dhe ka mbrojtur nderin e shqiptarëve në çdo dalje publike”, shkroi ai.

Ai përmendi gjithashtu gjestin e Granitit me “shqiponjën” në Botërorin e Rusisë, përballjen e Taulantit me tifozët serbë në Beograd dhe angazhimin e vazhdueshëm të vëllezërve Xhaka për të përfaqësuar shqiptarët me dinjitet:

“Vëllezërit Xhaka nuk e kanë mohuar kurrë prejardhjen e tyre, përkundrazi – çdo dalje publike është dëshmi e krenarisë së tyre kombëtare”, shtoi Ragipi.

Në fund, ai bëri thirrje që kritikët të reflektojnë: “Kur e shani Granitin, nuk po shani vetëm një futbollist, por një emblemë krenarie shqiptare. Xhakat kurrë nuk janë gjunjëzuar dhe nuk do të gjunjëzohen.”