Mounir Nasraoui, babai i yllit të Barcelonës dhe të kombëtares spanjolle, Lamine Yamal, është sërish në qendër të polemikave në rrjetet sociale.
Këtë herë, gjithçka nisi gjatë një transmetimi të drejtpërdrejtë, ku Nasraoui, i cili ndiqet nga më shumë se 1.4 milionë persona në Instagram, iu përgjigj një përdoruesi që e kishte këshilluar të shkonte të punonte.
“Nuk kam nevojë të punoj, djalosh. Nuk kam nevojë të punoj, kam miliona, falë Zotit”, deklaroi ai gjatë transmetimit.
Fjalët e babait të talentit të Barcelonës shkaktuan reagime të shumta në rrjetet sociale, ku disa përdorues shprehën pakënaqësinë e tyre ndaj qëndrimit të tij.
Kjo nuk është hera e parë që Mounir Nasraoui tërheq vëmendjen me deklaratat dhe paraqitjet e tij publike. Prania e tij e vazhdueshme në rrjetet sociale dhe fama gjithnjë në rritje e të birit duket se e kanë kthyer atë në një personazh të komentuar shpesh nga tifozët dhe ndjekësit e futbollit.