Barcelona në krizë/ Nuk regjistron dot blerjet e reja, Messi rrezikon largimin

Barcelona po kalon një situatë shumë të vështirë ekonomike pas pandemisë, teksa këtë vit nuk mund të regjistrojë asnjë blerje të re.  Klubi blaugrana ka kaluar limitin e pagave në skuadër, një rregull fiks i La Ligas, dhe derisa klubi të përfundojë spastrimet për të rregulluar bilancin, afrimet e reja si Sergio Aguero, Memphis Depay apo Eric Garcia nuk mund të figurojnë pjesë e kampionatit spanjoll të futbollit.

Media spanjolle raporton se nga 347 milionë euro rroga që Barcelona jep çdo vit, blaugranat duhet të reduktojnë totalin e pagave në rreth 160 milionë euro, një shkurtim drastik që ka çuar në vendime si ajo e lënies së lirë të Miralem Pjanic, praktikisht për të mos e paguar më.

Barça vijon me largimet si Junior Firpo e Francisco Trincao në Premier League, Todibo në Francë apo Umtiti, Coutinho e Pjanic, të cilët së bashku do të kursenin rreth 230 milionë euro rroga. Situata ka krijuar frikë te tifozët sa i përket të ardhmes së Leo Messit, i cili mund të ketë luajtur sfidën e fundit te katalanasit dhe tashmë mund të largohet. PSG dhe City janë gati që të përfitojnë.