Barcelona pa trajner në “El Clasicon” e së dielës ndaj Real Madridit

Barcelona merr një goditje përpara supersfidës ndaj Real Madridit. Komiteti i Apelit ka rrëzuar ankesën e klubit katalanas për anulimin e pezullimit të trajnerit Hansi Flick, i cili ishte përjashtuar nga fusha në ndeshjen e fundit të La Ligës ndaj Gironës.

Vendimi, i marrë të enjten në mbrëmje, konfirmon se tekniku gjerman duhet të vuajë një ndeshje pezullim, duke e detyruar atë të mungojë në “El Clásico”-n e së dielës në “Santiago Bernabéu”.

Barcelona kishte argumentuar se raporti arbitral i Gil Manzano nuk pasqyronte saktësisht ngjarjet që ndodhën në fushë, duke kërkuar anulimin e dy kartonëve të verdhë që sollën përjashtimin e Flick-ut. Megjithatë, Komisioni Disiplinor e ka hedhur poshtë pretendimin, duke theksuar se klubi nuk ofroi prova të mjaftueshme për të vërtetuar një gabim arbitrar.

Me këtë vendim, Komiteti i Apelit ka konfirmuar qëndrimin e Komisionit Disiplinor, duke i mbyllur praktikisht dyert Barcelonës për çdo apelim tjetër sportiv.

Hansi Flick do të detyrohet të ndjekë nga tribuna një nga ndeshjet më të rëndësishme të sezonit, ndërsa drejtimin e ekipit në “El Clásico” do ta marrë përkohësisht stafi i tij ndihmës.