Bayerni shkatërron Lyon-in dhe sfidon PSG në finalen e Champions League (VIDEO)

Bayern Munich-PSG do të jetë finalja e Champions League për edicionin 2019-2020. Skuadra gjermane fitoi pa shumë probleme 3-0 në gjysmëfinalen kundër Lyon-it. Ishte një ndeshje e nisur me një ritëm fantastik nga të dyja skuadrat, teksa francezët ju afruan dy herë golit, por Neuer ishte në mbrëmjen e tij më të mirë.

Ekipi i Flick është vrastar në sulmet e saj, teksa në minutën e 18-të, gjen golin e avantazhit pas një “perle” të shënuar nga Serge Gnabry. Sulmuesi i talentuar do të shënonte një tjetër gol në minutën e 33-të, duke i dhënë një goditje të rëndë shpresave të skuadrës së Garcias.

Në pjesën e dytë Lyon shtoi aksionet sulmuese, por pa mundur që të rihapte ndeshjen. Dy minuta nga fundi i kohës së rregullt, Lewandowki shënoi dhe golin e tretë me kokë. Finalja e Champions League do të luhet të dielën në mbrëmje, me bavarezët që shkojnë super të favorizuar. /R.Lika-Koha Jone/