Berisha: Lituania vendimtare për rrugëtimin tonë, të rinjtë duan kohë

Kapiteni i Kombëtares, Etrit Berisha ishte në krah të trajnerit Edi Reja në konferencën për shtyp para duelit ndaj Lituanisë për Ligën e Kombeve. Gardiani i kuqezinjve deklaroi se rivalët janë të rrezikshëm, teksa kjo ndeshje sipas tij do të vendosë edhe për të ardhmen në grupin tonë.

Sa e vështirë do të jetë përballja e nesërme, duke pasur parasysh edhe humbjen e muajit të kaluar?

Unë mendoj që Lituania luajti shumë mirë në ndeshjen e parë. Taktikisht kanë luajtur shumë mirë dhe na kanë vënë në vështirësi, por ndoshta edhe ne nuk e kemi bërë ndeshjen më të mirë. Megjithatë tani vlen ndeshja e nesërme, ku ne duhet të jemi jashtëzakonisht të përqendruar dhe përgatitur, pasi është një ndeshje kyçe për rrugëtimin tonë.

Çfarë ka ndryshuar te Shqipëria, krahasuar me përballjen e një muaji më parë?

Ndeshja kundër Kazakistanit ka qenë ndeshje pozitive, ku kam parë një grintë shumë më të mirë se kundër Lituanisë muajin e kaluar. Megjithatë gjithë çunat e dinë rëndësinë e ndeshjes nesër dhe duhet të japin 110% për të arritur objektivin tonë. Kundër Lituanisë kemi humbur dhe nuk duhet të lejojmë që ata të marrin epërsinë.

Si u janë dukur lojtarët e afruar rishtazi në skuadër?

E vërtetë që në grup kemi lojtarë të rinj dhe ka shumë prurje të reja për shkak edhe të mungesave. Djemtë e rinj kanë kualitet, por iu duhet kohë që të luajnë me Kombëtaren dhe të ambientohen. Duhet të japin maksimumin e tyre dhe njëkohësisht ne më të vjetrit duhet t’i ndihmojmë me të gjitha mënyrat. Kur të arrihet vetëbesimi në skuadër, gjithë ekipi do të përfitojë.