“Beteja” për mbijetesë në Superiore/ Tirana barazon me Skënderbeun, fiton Teuta

Kjo javë e 34-të në elitën e futbollit shqiptar solli përballje të drejtpërdrejta për mbijetesën, me rezultate që ndikojnë në luftën për mbijetesë.

Në “Skënderbeu Stadium” në Korçë, Skënderbeu dhe Tirana ndanë nga një pikë, duke barazuar 1-1 në një sfidë me dy tablo të ndryshme. Vendasit dominuan në pjesën e parë dhe kaluan në avantazh me golin e zakonshëm të Saleh Nasr në minutën e 36-të.

Ndërsa në pjesën e dytë, Tirana reagoi fort, duke marrë kontrollin e lojës dhe arriti të barazojë me Ardit Ndrecën në minutën e 53-të.Ky rezultat lë Tiranën në vendin e tetë me 36 pikë, vetëm një më pak se Skënderbeu, që mban vendin e shtatë me 37 pikë.

Një tjetër hap i rëndësishëm për mbijetesën u regjistrua në Durrës, ku Teuta arriti një fitore me shumë peshë ndaj Laçit, me rezultatin minimal 1-0. Ky sukses ngjit durrsakët në vendin e gjashtë me 38 pikë, duke u shkëputur disi nga zona e ftohtë. Për Laçin, humbja përkeqëson situatën. Kurbinasit mbeten në vendin e fundit me 33 pikë dhe rrezikojnë seriozisht rënien në Kategorinë e Parë.

Ndërkohë, edhe Bylisi nuk arriti të shmangte disfatën, duke u mposhtur 1-0 nga Elbasani. Ballshiotët mbeten në vendin e nëntë me 36 pikë.