Zbigniew Boniek ka bërë një deklaratë befasuese përpara ceremonisë së Topit të Artë, duke zgjedhur Lionel Messin si fituesin e tij, pavarësisht se favoritët për çmimin e këtij viti janë emra të tjerë. Ish-futbollisti polak vlerësoi talentin e Lamine Yamalit, por theksoi se ylli i Barcelonës ka ende kohë për të fituar trofeun prestigjioz.
Në një intervistë për emisionin Radio Anch’io Sport në Rai Radio 1, Boniek, aktualisht zëvendëspresident i UEFA-s, shprehu bindjen se Topi i Artë duhet t’i jepej sërish yllit argjentinas.
“Unë do t’ia jepja Topin e Artë Leo Messit, edhe pse favoritët për ta fituar sonte janë të tjerë”, deklaroi Boniek.
Sa i përket Lamine Yamalit, polaku nuk i kurseu vlerësimet për talentin e jashtëzakonshëm të sulmuesit të ri, por mendon se ai nuk duhet të nxitohet për të fituar çmimin më të rëndësishëm individual në futboll.
“Yamal është një futbollist shumë i fortë, i jashtëzakonshëm, por është ende shumë i ri dhe mund të presë edhe pak. Në Spanjë ka shumë lojtarë të tjerë të nivelit të lartë”, u shpreh ai.
Ish-futbollisti polak komentoi gjithashtu kandidaturat e Kylian Mbappés dhe Harry Kane, duke argumentuar se për të fituar Topin e Artë duhet të kesh arritur një sukses të jashtëzakonshëm me skuadrën.
“Për ta fituar këtë trofe, duhet të kesh fituar diçka të jashtëzakonshme. Nuk më duket se kjo ka ndodhur në rastin e tyre, megjithëse francezi më pëlqen shumë”, theksoi Boniek.