Botërori 2026 thyen rekorde/ Mbi 4.6 milionë tifozë në stadiume gjatë fazës së grupeve

Kupa e Botës 2026 vazhdon të vendosë rekorde të reja. Sipas të dhënave të publikuara nga FIFA, plot 4.644.549 tifozë kanë ndjekur nga afër 72 ndeshjet e fazës së grupeve, me një mesatare prej rreth 64 mijë spektatorësh për çdo takim.

Ky është Botërori i parë në histori me 48 kombëtare pjesëmarrëse dhe i pari që organizohet njëkohësisht në tre vende, Shtetet e Bashkuara të Amerikës, Kanada dhe Meksikë.

Mes statistikave më interesante të 17 ditëve të para të turneut, FIFA ka zbuluar se në stadiumet e 16 qyteteve pritëse janë konsumuar rreth 300 mijë hot dog. Sipas një llogaritjeje simbolike të organizatës, nëse këta hot dog do të vendoseshin njëri pas tjetrit, do të mbulonin një distancë prej afërsisht 45 kilometrash, sa largësia mes stadiumit New York New Jersey dhe Aeroportit Ndërkombëtar John F. Kennedy (JFK).

Një tjetër rekord lidhet me numrin e futbollistëve të aktivizuar në turne. Deri tani, 999 lojtarë kanë zbritur në fushë nga 1.248 futbollistët e grumbulluar nga kombëtaret pjesëmarrëse, një shifër e paprecedentë që lidhet drejtpërdrejt me zgjerimin e turneut në 48 skuadra.

Ndërkohë, faza me eliminim direkt ka nisur tashmë, me Kanadanë që siguroi kualifikimin në raundin tjetër pas fitores minimale 1-0 ndaj Afrikës së Jugut në 1/16-at e finales. Botërori 2026 do të kulmojë më 19 korrik, kur do të zhvillohet finalja e madhe e turneut më të ndjekur sportiv në planet.