Botërori 2026, Trump: Nuk më intereson nëse do të jetë ose jo Irani!

Presidenti i Shteteve të Bashkuara, Donald Trump, ka ndezur polemika me deklaratat e tij të fundit lidhur me pjesëmarrjen e Iranit në Kupën e Botës. Në një intervistë për Politico, Trump u shpreh hapur se nuk i intereson nëse kombëtarja iraniane do të marrë pjesë apo jo në turneun e ardhshëm botëror, që do të zhvillohet në SHBA, Kanada dhe Meksikë.

“Nuk më intereson nëse Irani do të jetë apo jo aty. Mendoj se Irani është një vend i mundur rëndë. Po shkon drejt shkatërrimit”, deklaroi presidenti amerikan, duke shtuar tension politik në prag të një eventi global sportiv.

Aktualisht, Irani ka siguruar kualifikimin dhe është planifikuar të luajë më 15 qershor ndaj Zelandës së Re në Los Anxhelos, më 21 qershor kundër Belgjikës po në Los Anxhelos dhe më 26 qershor përballë Egjiptit në Seattle.

Skenari bëhet edhe më interesant nëse si SHBA ashtu edhe Irani do ta mbyllnin grupin përkatës në vendin e dytë. Në këtë rast, dy kombëtaret mund të përballeshin në një ndeshje direkte me eliminim më 3 korrik në Dallas, një duel që do të kishte jehonë jo vetëm sportive, por edhe të fortë politike.