Ernest Muçi largohet nga Kombëtarja dhe humb sfidën me Ukrainën, ja arsyeja

Sulmuesi Ernest Muçi nuk do të jetë në dispozicion të trajnerit Silvinjo për ndeshjen miqësore ndaj Ukrainës, që do të zhvillohet më 31 mars.

Sipas njoftimit nga Federata Shqiptare e Futbollit, lojtari ka shfaqur probleme fizike dhe nuk ka marrë pjesë në seancat stërvitore me pjesën tjetër të ekipit. Për këtë arsye, është vendosur largimi i tij i parakohshëm nga grumbullimi i kuqezinjve.

Muçi do të rikthehet menjëherë pranë klubit të tij, Trabzonspor, ku pritet t’u nënshtrohet ekzaminimeve të mëtejshme mjekësore për të përcaktuar shkallën e dëmtimit.

Sulmuesi u rikthye në radhët e Kombëtares për ndeshjet e fazës “play-off”, ku në sfidën e fundit ndaj Polonisë u aktivizua si zëvendësues gjatë pjesës së dytë. Ky është largimi i tretë nga radhët e Shqipërisë pas Ylber Ramadanit dhe Arlind Ajetit.

Gjithashtu, në seancën e sotme stërvitore nuk mori pjesë edhe mesfushori Jasir Asani, i cili ka pësuar një goditje në gjurin e djathtë gjatë stërvitjes së djeshme. Stafi mjekësor po e mban në monitorim të vazhdueshëm gjendjen e tij dhe nesër do të vlerësohet nëse futbollisti do të jetë i gatshëm për t’u rikthyer në stërvitje.

Ndeshja miqësore mes Ukrainës dhe Shqipërisë do të zhvillohet më 31 mars, në orën 20:45, në stadiumin Estadi Ciutat de València, në Valencia.