
Brajan Gruda përjetoi një javë ëndrrash me fanellën e Gjermanisë. Talenti me origjinë shqiptare ka pasur nevojë për vetëm katër ditë për të tërhequr vëmendjen e opinionit sportiv gjerman, duke u shndërruar në një nga emrat më të komentuar të përfaqësueses.
Fillimisht, ai debutoi me gol në përballjen ndaj Serbisë, ku u aktivizua si zëvendësues. Më pas, në sfidën kundër Holandës, fitoi besimin për të qenë titullar dhe e shpërbleu në mënyrën më të mirë të mundshme: një gol, dy asiste dhe një paraqitje spektakolare në fitoren 5-0 të Gjermanisë.
Performanca e tij ka marrë vëmendje të jashtëzakonshme edhe në mediat gjermane. E përditshmja prestigjioze “Bild” i ka kushtuar një artikull të veçantë me titullin “Djemtë e Klopp”, ku ka analizuar talentet e reja që kanë spikatur në ndeshjet e fundit. Sigurisht, një vend të veçantë në këtë shkrim ka edhe futbollisti me origjinë nga Shkodra.
“Për shumë tifozë, Brajan Gruda është pothuajse i padallueshëm nga Wirtz, për shkak të ngjashmërisë në stilin e lojës. Kjo temë shkaktoi shumë diskutime në rrjetet sociale pas ndeshjes.
Pas një debutimi ëndrrash, ku shënoi edhe kundër Serbisë, numri 10 i Gjermanisë zhvilloi një paraqitje edhe më të mirë ndaj Holandës, duke realizuar një gol dhe duke dhënë dy asiste.
Ylli i RB Leipzig është një driblues i shkëlqyer dhe një kënaqësi e vërtetë për t’u parë sa herë që ka topin në këmbë. Pasimi me pjesën e jashtme të këpucës, në aksionin që solli golin e Wirtz për rezultatin 4-0, ishte thjesht i jashtëzakonshëm!
Kur e ftoi në përfaqësuese, Klopp e përshkroi si një ‘lojtar fantastik’, me stilin e lirshëm të një futbollisti rruge. Një nga veçoritë e tij janë edhe çorapet e ulura poshtë.
Gruda zotëron nënshtetësinë gjermane dhe shqiptare, ndërsa vjen nga një familje me traditë në futboll. Babai i tij, Bujar Gruda (63 vjeç), ka qenë gjithashtu futbollist profesionist dhe ka luajtur për klubin shqiptar Vllaznia në ish-Kupën UEFA.
Familja është gjithmonë pranë tij. Prindërit, Bujari dhe Manjola, ndjekin pothuajse çdo ndeshje të djalit të tyre. Ylli i Gjermanisë është gjithashtu në një lidhje prej kohësh, megjithëse preferon ta mbajë jetën private larg vëmendjes publike”, shkruan “Bild”.
