Briken Calja shkëlqen në Taranto 2026, medalje ari dhe rekord për Shqipërinë

Briken Calja ka dhuruar një paraqitje të shkëlqyer në Lojërat Mesdhetare “Taranto 2026”, duke i dhuruar Shqipërisë dy medalje në peshëngritje.

Peshëngritësi shqiptar triumfoi fillimisht në stilin e shkëputjes në kategorinë deri në 75 kilogramë, ku fitoi medaljen e artë dhe vendosi njëkohësisht edhe rekord të ri të Lojërave Mesdhetare.

Calja e nisi garën me 147 kilogramë në provën e parë, ndërsa në tentativën e dytë ngriti me sukses 152 kilogramë. Në provën e tretë ai shkoi deri në 154 kilogramë, duke kaluar me sukses të treja tentativat dhe duke siguruar medaljen e artë.

Më pas, shqiptari garoi edhe në stilin e shtytjes, ku arriti të marrë medaljen e bronztë. Calja dështoi në provën e parë me 182 kilogramë, por reagoi menjëherë në tentativën e dytë, duke ngritur me sukses 184 kilogramë.

Në provën e tretë, peshëngritësi kuqezi tentoi të ngrejë 187 kilogramë, por nuk ia doli, duke u renditur në vendin e tretë dhe duke siguruar medaljen e bronztë.

Edhe pse objektivi i Caljës ishte të fitonte dy medalje ari, ai largohet nga gara me një të artë dhe një të bronztë, duke konfirmuar edhe një herë statusin e tij si një prej sportistëve më të rëndësishëm të peshëngritjes shqiptare.

Me dy medaljet e Caljës, Shqipëria e çon në pesë numrin total të medaljeve në Lojërat Mesdhetare “Taranto 2026”: dy të arta, një të argjendtë dhe dy të bronzta.

Përpara suksesit të Caljës, Shqipëria kishte fituar tri medalje në mundje. Islam Dudajev siguroi medaljen e artë, Zelimkhan Abakarov atë të argjendtë, ndërsa Ardit Zeneli fitoi medaljen e bronztë.