Carragher bën parashikimin e çmendur: Haaland do të shënojë më shumë se 1000 gola

Erling Haaland nuk ndalet së shënuari dhe tashmë ka marrë një tjetër vlerësim të madh. Jamie Carragher beson se sulmuesi norvegjez i Manchester City-t ka potencialin për t’u bërë golashënuesi më i mirë në historinë e futbollit, madje duke arritur shifrën e pabesueshme të 1.000 golave në karrierë.

Haaland ishte sërish protagonist në Champions League, duke realizuar një dopietë në fitoren 2-0 të Manchester City-t ndaj Portos. Me dy golat në Portugali, norvegjezi e çoi në 167 numrin e golave me fanellën e City-t në vetëm 203 ndeshje.

Shifrat e tij në Champions League janë edhe më të jashtëzakonshme: 59 ndeshje dhe 59 gola. Në total, Haaland ka arritur në 366 gola në 445 paraqitje, duke përfshirë klubet dhe kombëtaren.

Ish-mbrojtësi i Liverpool-it dhe analisti i CBS Sports, Jamie Carragher, është i bindur se Haaland mund të shkruajë historinë.

“Thjesht nuk e shoh se si Haaland nuk mund të shënojë 1.000 gola ose të bëhet golashënuesi më i mirë i të gjitha kohërave”, deklaroi Carragher pas ndeshjes së City-t me Porton.

“Unë nuk kam parë kurrë diçka të tillë sa i përket golave dhe shifrave. Dhe kjo ndodh në çdo ndeshje. Por, pikërisht sepse e bën kaq shpesh, nuk duket më si diçka e jashtëzakonshme”, shtoi ai.

“Ka shënuar dy gola jashtë fushe në Champions League dhe për çdo sulmues tjetër do të ishte një natë e jashtëzakonshme. Me Haaland-in, gjithçka duket normale”.

Aktualisht, Haaland është ende larg kreut të listës së golashënuesve më të mirë të të gjitha kohërave. Në krye qëndron Cristiano Ronaldo me 978 gola, i ndjekur nga Lionel Messi me 927.

Top 10 golashënuesit e të gjitha kohërave:

Cristiano Ronaldo – 978 gola

Lionel Messi – 927 gola

Pelé – 762 gola

Romário – 756 gola

Ferenc Puskás – 725 gola

Josef Bican – 722 gola

Robert Lewandowski – 703 gola

Jimmy Jones – 639 gola

Gerd Müller – 634 gola

Joe Bambrick – 626 gola

Haaland, me 366 gola, ka ende një distancë të konsiderueshme për të përshkuar. Për të arritur në 1.000 gola, norvegjezi do të duhet të realizojë edhe 634 herë.