Cavani kërkon të rikthehet në Itali, shfaqet ideja për kalimin tek Interi

Teksa në Seria A po mendohet për rinisjen e kampionatit, Interi po mendon edhe për sezonin e ardhshëm. Edinson Cavanit i përfundon kontrata me Paris Saint Germain në fund të këtij sezoni, por duket se nuk ka ndërmend të largohet nga Europa dhe u ka konfirmuar menaxherëve të tij se preferon të rikthehet në Itali.

Kjo sipas mediave italiane, që konfirmojnë se përfaqësuesit e sulmuesit uruguaian kanë kontaktuar së fundi me dyshen e merkatos së Interit, Marotta-Ausilio dhe u kanë ofruar klientin e tyre për dy sezonet në vijim.

Gjithashtu mësohet se ideja është vlerësuar edhe nga zikaltrit, që do të kenë të pamundur arritjen te Olivier Giroud dhe me largimin e mundshëm të Lautaro Martinezit si dhe të Sanchez, do të mbeteshin vetëm me Romelu Lukakun në sulm.

Conte vlerëson Cavanin si sulmues, pasi uruguaiani është një futbollist që mund të luajë si në vendin e Lukakut, ashtu edhe në krah të belgut, duke qenë se di të dalë nga zona dhe të krijojë hapësira për të tjerët.

Momentalisht problem i vetëm mbetet paga e lartë që Cavani përfiton te PSG-ja, rreth 10 milionë euro në sezon, pasi te Interi nuk janë gati t’i japin më shumë se 13 milionë euro për dy sezone.