Champions League/ Juvja dhe Reali “ngecin” në 45 minutat e para

Kanë përfunduar 45 minutat e para në katër sfidat e mbrëmjes në Champions League.

Në “Santiago Bernabéu”, Real Madrid dhe Olympique Marseille kanë shkuar në pushim me rezultatin 1-1. Skuadra madrilene pësoi një goditje të hershme kur pas vetëm pesë minutash loje, Alexander-Arnold u detyrua të linte fushën i dëmtuar, duke i lënë vendin Dani Carvajal.

Francezët zhbllokuan sfidën në minutën e 22-të: një gabim i Arda Güler u shfrytëzua menjëherë nga miqtë, me Mason Greenwood që shërbeu një asist perfekt për Timothy Weah, ish-sulmuesin e Juventus, i cili mposhti Courtois. Reagimi i Realit erdhi shpejt. Në minutën e 29-të, Kylian Mbappé shënoi nga pika e bardhë, pasi penalltia u fitua nga Rodrygo, i ndalur në mënyrë të parregullt brenda zonës.

Ndërkohë në Londër, Tottenham është në epërsi 1-0 kundër Villarreal. Goli erdhi që në minutën e 4-t, pas një gafë të portierit Luis Junior. Një krosim i thjeshtë i Bergvall nuk u kontrollua siç duhet nga gardiani spanjoll, i cili e shpëtoi topin nga duart dhe e futi në portën e tij, duke i dhuruar avantazhin londinezëve.

Juventus po barazon pa gola ndaj Dortmundit, me disa kundësi të mira me Thuram dhe Openda.