City shkatërron Arsenalin, Guardiola i jep leksion ish-ndihmësit të tij (VIDEO)

Manchester City e kanë rinisur në mënyrën më të mirë Premier League, duke shkatërruar 3-0 Arsenalin. Trajneri Guardiola i dha një leksion ndihmësit të tij Mikel Arteta, por ky i fundit tradhtohet nga zëvendësimet dhe “i zakonshmi” David Luiz.

Xhaka u dëmtua që pas 5 minutash lojë, ndërsa Mari i la vendin pas dëmtimit po në pjesën e parë mbrojtësit brazilian. Sterling do të shënonte në fundin e pjesës së parë me një goditje potente.

Pjesa e dytë nisi sërish me Luiz protagonist, teksa u ndëshkua me karton të kuq në minutën e 49-të. De Bruyne do të shënonte nga pika e bardhë, vetëm dy minuta më pas.

City nuk e uli ritmin me një lojtar më shumë në fushën e lojës. Foden realizoi dhe golin e tretë për të mbyllur ndeshjen 3-0. Në fundin e ndeshjes pati ankth pas një dëmtimi të Garcias nga një përplasje me portierin Ederson.