Como eliminon Napolin nga Kupa, sfidon Interin në gjysmëfinale

Në stadiumin “Maradona”, Como i drejtuar nga Cesc Fàbregas realizon surprizën e madhe duke eliminuar Napolin pas goditjeve të penalltive me rezultatin 8-7, pasi koha e rregullt u mbyll në barazim 1-1.

Kampionët e Italisë e nisën më mirë takimin dhe ushtruan presion të vazhdueshëm ndaj miqve, por ishin pikërisht larianët që kaluan të parët në avantazh. Në minutën e 39-të, Olivera rrëzon Gutiérrez në zonë dhe arbitri akordon penallti, të cilën Baturina e shndërron në gol.

Reagimi i Napolit erdhi menjëherë në fillimin e pjesës së dytë: vetëm në minutën e parë, Vergara shënon golin e barazimit, duke rikthyer ekuilibrin në sfidë. Deri në fund të kohës së rregullt rezultati mbeti i pandryshuar dhe ndeshja u vendos nga pika e bardhë.

Në serinë e penalltive, pas gabimeve të Lukakut dhe Perrones, sfida shkoi në goditje të njëpasnjëshme. Momenti vendimtar erdhi kur Lobotka gaboi, duke u ndalur nga pritja e Butez, që i dha kualifikimin Comos.
Skuadra e Fàbregas shpërthen në festë dhe tashmë përgatitet për gjysmëfinalen kundër Interit të drejtuar nga Cristian Chivu.