Conte në telashe, Rrahmani dhe Politano rrezikojnë të mungojnë ndaj Juves

Fati i keq vazhdon ta ndjekë Napolin, duke e goditur skuadrën në një moment kyç të sezonit. Pas një serie dëmtimesh që kanë shoqëruar ekipin në pjesën e parë të kampionatit, trajneri Antonio Conte duhet të përballet tashmë edhe me mungesat e Amir Rrahmanit dhe Matteo Politano-s.

Të dy lojtarët u detyruan të lënë fushën të dëmtuar gjatë ndeshjes së luajtur në “Diego Armando Maradona” ndaj Sassuolos. Gjatë orëve të paradites, Rrahmani dhe Politano iu nënshtruan ekzaminimeve mjekësore, të cilat do të plotësohen edhe gjatë ditës së nesërme. Sipas rezultateve të para, të dy kanë pësuar dëmtime muskulare në zonën e fleksorit.

Ende mbetet për t’u përcaktuar shkalla e dëmtimit dhe koha e rikuperimit, por duket pothuajse e sigurt se të dy do të mungojnë në transfertën e rëndësishme të Champions League të martën në Kopenhagen. Gjithashtu, prania e tyre në supersfidën e fundjavës së ardhshme ndaj Juventusit, më 25 janar, është seriozisht në dyshim.

Këto dy mungesa përbëjnë një goditje të rëndë për Napolin, i cili ndodhet përballë një kalendari tejet të ngjeshur. Pas ndeshjes me Juventusin, skuadra napolitane do të presë Chelsean më 28 janar, ndërsa më 31 janar në “Maradona” është planifikuar përballja me Fiorentinën. Pas një serie prej katër ndeshjesh brenda 11 ditësh, Napoli do të udhëtojë më 7 shkurt drejt Marassit për duelin kundër Genoas.