Conte rigjen buzëqeshjen, De Bruyne rikthehet në stërvitje

Kriza e rezultateve vijon të rëndojë mbi Napoli, me skuadrën e drejtuar nga Antonio Conte që rrezikon të mbetet jashtë objektivave madhorë të sezonit. Në këtë fazë të kampionatit, synimi minimal për napolitanët mbetet sigurimi i një vendi në Champions League, pasi çdo përfundim tjetër do të konsiderohej dështim.

Pas humbjes ndaj Atalanta, skuadra është rikthyer në stërvitje për të përgatitur sfidën e radhës kundër Hellas Verona. Mes vështirësive, një lajm pozitiv vjen nga rikthimi në qendrën stërvitore i mesfushorit belg Kevin De Bruyne.

Ylli belg është parë sërish në fushë pas një mungese të gjatë që prej 25 tetorit të vitit të kaluar. Megjithatë, ai vijon të punojë i diferencuar nga grupi dhe nuk është ende gati për rikthim të menjëhershëm në ndeshje zyrtare. Sipas raportimeve të fundit, De Bruyne pritet të jetë i disponueshëm në mesin e marsit, në sfidën kundër Lecce.

Conte shpreson se rikthimi i belgut mund të ndikojë drejtpërdrejt në kthesën e sezonit, pasi Napoli po kalon një periudhë të vështirë dhe rrezikon seriozisht pjesëmarrjen në Champions. Aktualisht, napolitanët renditen në vendin e tretë me 50 pikë, po aq sa Roma, ndërsa mbajnë katër pikë avantazh ndaj Juventus, që ndodhet në vendin e pestë.