Me të ardhmen e Sylvinho ende të paqartë pas përfundimit të kontratës në qershor, Federata Shqiptare e Futbollit ndoshta do të duhet të kërkojë për një trajner të ri. Në këtë skenar, një nga emrat që po përmendet gjithnjë e më shpesh është ai i Ilir Daja, aktualisht në krye të Dinamo City.
Daja konsiderohet si një ndër trajnerët më të kompletuar të futbollit shqiptar në dekadën e fundit, falë një karriere të ndërtuar mbi rezultate konkrete dhe një filozofi loje të qartë. Ai ka arritur të fitojë titullin kampion në Shqipëri me Skënderbeun, duke qenë pjesë e një prej periudhave më dominuese në historinë e klubit. Përveç kësaj, ai ka ngritur edhe trofe të tjerë të rëndësishëm, si Kupa e Shqipërisë dhe Superkupa, duke konfirmuar vazhdimësinë e suksesit të tij.
Një nga pikat më të forta të Dajës mbetet eksperienca në arenën ndërkombëtare. Ai ka drejtuar skuadra shqiptare në kompeticionet europiane, duke qenë protagonist me Ballkanin në Kosovë në vitet e fundit.
Në aspektin taktik, Daja njihet për fleksibilitetin dhe aftësinë për të përshtatur skuadrën sipas kundërshtarit. Ai ka treguar se di të ndërtojë grupe solide, duke kombinuar lojtarë të rinj me elementë me eksperiencë, një cilësi thelbësore për një përfaqësuese si Kombëtarja e Shqipërisë.
Një tjetër element që e favorizon kandidaturën e tij është njohja e thellë e kampionatit vendas dhe e lojtarëve shqiptarë, brenda dhe jashtë vendit. Kjo do t’i lejonte një tranzicion më të shpejtë dhe më efikas në rast emërimi.
Në një moment kur Shqipëria kërkon vazhdimësi, stabilitet dhe rritje, profili i Ilir Dajës shfaqet si një alternativë mjaft e mirë në këtë moment delikat për Kombëtaren tonë. /R.Lika-Koha Jonë/