David Beckham shpallet “Sir”, Mbreti Charles III i jep titullin e shumëpritur

Pas më shumë se një dekade pritjeje dhe pengesash, David Beckham është shpallur zyrtarisht “Sir” nga Mbreti Charles III. Ceremonia e nderimit u mbajt sot në Kalanë e Windsor, ku ish-ylli i Anglisë dhe Manchester United mori titullin e kalorësit për kontributet e tij në sport dhe bamirësi.

Në momentin emocionues ishin të pranishëm edhe prindërit e tij dhe bashkëshortja, Victoria Beckham, të cilët e ndoqën me krenari ceremoninë. Beckham, tashmë 50 vjeç, e quajti këtë vlerësim një “nder të jashtëzakonshëm” dhe tha se ndihej jashtëzakonisht krenar që u përfshi në listën e nderimeve për ditëlindjen e Mbretit.

Ky titull vjen pas një pritjeje të gjatë që nisi që në vitin 2011, kur Beckham u propozua për herë të parë për nderim pas ndihmës së tij vendimtare në sigurimin e Lojërave Olimpike të Londrës 2012. Megjithatë, procesi u bllokua për vite me radhë për arsye burokratike.

Ish-mesfushori, baba i katër fëmijëve dhe me 115 ndeshje për Kombëtaren e Anglisë, ka ndërtuar ndërkohë një marrëdhënie të ngushtë me Mbretin Charles.