Dëmtimi i Bremer, Juventus ka gati 3 alternativa për ta zëvendësuar

Dëmtimi i Gleison Bremerit ka krijuar sërish probleme të mëdha për Juventusin. Pasi mungoi për gjithë sezonin e kaluar, qendërmbrojtësi brazilian do të qëndrojë përsëri jashtë fushave për disa kohë. Edhe pse këtë herë periudha e rikuperimit pritet të jetë më e shkurtër, ekziston rreziku i një rikthimi të dëmtimit, ndaj drejtuesit bardhezi kanë vendosur të ndërhyjnë në merkato gjatë janarit.

Sipas La Gazzetta dello Sport, objektivi kryesor i Juventusit është Milan Skriniar. Ish-mbrojtësi i Interit, aktualisht te Fenerbahçe, është një emër që prej kohësh pëlqehet nga klubi torinez dhe shihet si profili ideal për të forcuar repartin e mbrojtjes. Edhe pse lojtari sllovak ka deklaruar se ndihet mirë në Stamboll, largimi i trajnerit José Mourinho (tashmë te Benfica) mund ta bëjë më të lehtë shkëputjen e tij nga skuadra turke.

Alternativa për Skriniarin është Kim Min-jae i Bayern Munich, por në këtë rast pengesë mbetet statusi i tij si “jashtë BE-së”. Juventus dëshiron ta ruajë atë vend për një tjetër përforcim të mundshëm, Nahuel Molina nga Atletico Madrid, një lojtar shumë i vlerësuar nga trajneri Igor Tudor.

Bardhezinjtë kishin tentuar transferimin e argjentinasit edhe gjatë verës, por bisedimet nuk u konkretizuan. Tani, me nevojën urgjente për një mbrojtës anësor, operacioni mund të mbyllet që në janar.