Franca e Didier Deschamps do të sfidojë sot Spanjën, e cila ka shfaqur deri më tani një formë fantastike. Në konferencën për shtyp strateg i “gjelave” ka shprehur besimin se ekipi i tij i ka të gjitha mundësitë për të arritur në finale.
“Spanja është skuadra që ka impresionuar më shumë në këtë turne dhe duhet t’ua njohim këtë meritë. Në fakt edhe klubet spanjolle shquhen për kontrollin e topit. Mesfusha është arma më e fortë e Spanjës, veçanërisht me Pedrin, por ne jemi aty për të bërë ndeshjen tonë.
Nëse ndeshjet tona nuk ju pëlqejnë, atëherë mund të shihni ndeshje të tjera. Ky është një kompeticion i veçantë, shumë i vështirë për të gjithë. E vërtetë që kemi shënuar më pak gola, por kemi bërë ndeshje të mira dhe u kemi dhuruar emocione francezëve me rezultatet e arritura. Mbappe do të jetë në formën më të mirë ndaj Spanjës.
Ka vuajtur një problem në shpinë dhe më pas erdhi ai dëmtim në hundë, që e detyron të luajë me maskë. Megjithatë tani është mësuar edhe me maskën, përveç faktit që hunda e tij po përmirësohet gjithnjë e më shumë”, tha trajneri francez.