Dovedan: Nuk po e kuptoj çfarë po i ndodh Hidit, humbëm për shkak të tij

Trajneri i Bylisit, Dovedan, bëri përgjegjës për humbjen Isli Hidin, që gaboi sidomos te rasti i golit të dytë të kurbinasve. Ai tha se ndoshta ka ardhur momenti ndoshta për të aktivizuar portierin e dytë.

“Normalisht më vjen keq që nuk e fituam ndeshjen, e humbëm në këtë mënyrë për shkak të dy golave të pësuar për gabime të një portieri që e dimë se kush është. Nuk kam çfarë të bëj më shumë, ndoshta nga ndeshja e radhës do i besoj portierit tjetër, pasi u bënë disa ndeshje me këto gabime.

Kemi qenë një ekip që të tjerët e kishin të vështirë t’i shënonin. Kur pëson gola të tillë, është e vështirë për t’u kaluar ky moment. Hidi është portier shumë i mirë, por nuk po e kuptoj se çfarë ka ndodhur me atë këtë muaj”, deklaroi Dovedan.