Duka këshillon biznesmenin Samir Mane: Merr ndonjë klub futbolli se jeta nuk është vetëm lekë

Një nga emrat më të fuqishëm të biznesit shqiptar, Samir Mane, ka zhvilluar një takim me presidentin e FSHF,  Armand Duka, duke hapur diskutime interesante për të ardhmen e futbollit në Shqipëri. Vetë Mane e pranoi me humor arsyen e vizitës së tij në federatë, duke theksuar se përveç raportit institucional, me Dukën e lidh edhe miqësia personale.

Sipas tij, kreu i FSHF-së po përpiqet ta bindë që të angazhohet më drejtpërdrejt në financimin e futbollit, edhe pse, siç tha me shaka, nuk është ekspert i fushës.

“Jam këtu në federatën e futbollit për të takuar presidentin. Përveç si presidenti, ai është edhe shoku im, i cili, do të më mbush mendjen që unë të merrem pak më shumë me financimin e futbollit. Edhe pse mendon se unë nuk marr vesh nga futbolli. Do humb para besojë apo edhe mund të fitojë!”

Nga ana tjetër, Duka e orientoi bisedën përtej konceptit të thjeshtë të sponsorizimit. Ai theksoi se sfida reale nuk qëndron vetëm te investimi financiar, por te menaxhimi profesional i një klubi futbolli.

“Jo, në fakt ti nuk merr vesh nga futbolli. Unë nuk dua të mbush mendjen për financim. Sepse të hedhësh disa lekë është gjë e lehtë ose të marrësh ca lekë, të domosdoshme janë lekët.

Por ti (Samir Mane) je më i miri në menaxhim. Kështu që dua të mbush mendjen të menxhosh një klub futbolli. Nuk është jeta vetëm lekë, se ikim. Menxho një klub futbolli, sepse njerëzit e duan futbollin. Ti e menaxhon mirë, pavarësisht se nuk merr vesh teknikisht. Ti nuk ke humbur asnjëherë, kështu që nuk besojë do humbësh. Do fitosh siç ke fituar edhe herët e tjera. Mendoje këtë punë”.