Duka reagon për emërimin e Tares te Milani: Një arritje e rëndësishme, do t’ia dalësh edhe këtë herë”

Presidenti i Federatës Shqiptare të Futbollit, Armand Duka, ka uruar zyrtarisht Igli Taren pas emërimit të tij si drejtor Sportiv i klubit Milanit. Në një mesazh të publikuar në rrjetet sociale, Duka e cilëson këtë hap të ri në karrierën e Tares si një sukses të jashtëzakonshëm dhe një mundësi për të kontribuar në rikthimin e Milanit në majat e futbollit evropian.

“Urime Igli! Emërimi yt si Drejtor Sportiv i klubit të Milanit është një arritje vërtet e rëndësishme. Besoj fort se profesionalizmi, përkushtimi dhe vizioni yt do ta ndihmojnë këtë klub legjendar të rikthehet në nivelet që i takojnë, ashtu si në kohët e lavdishme të historisë së tij.”

Më tej, Duka kujton eksperiencën e suksesshme të Tares te Lazio dhe shpreh bindjen se ai do të ketë sukses edhe në këtë kapitull të ri:“Ti ke dëshmuar më parë te Lazio, ku për vite me radhë ke ndërtuar me sukses një projekt të qëndrueshëm dhe konkurrues në arenën ndërkombëtare. Tani të pret një tjetër sfidë e madhe, por jam i bindur se do t’ia dalësh edhe këtë herë, me të njëjtën maturi dhe pasion për lojën.”