Dybala ndodhej në Rusi me Juven, hajdutët i vjedhin shtëpinë

Vjedhja e shtëpive të futbollistëve në Itali është kthyer në një fenomen shqetësues. Këtë herë, radhën e kishte shtëpia e futbollistit të Juventusit, Paulo Dybala të ishte në shënjestrën e një grupi grabitësish.

Sulmuesi argjentinas ndodhej në Rusi me ekipin për transfertën e Juventus nga Zenit dhe për këtë arsye hajdutët kishin gjetur momentin e duhur për të hyrë të pashqetësuar në shtëpi.

Mediat italiane shkruajnë se argjentinasit i është marrë një koleksion i shtrenjtë orësh nga shtëpia e sulmuesit bardhezi, por hetimet vijojnë për të parë nëse është vjedhur diçka tjetër.

Policia u njoftua nga banorët e zonës për grabitjen, por ajo mbërriti në vendngjarje me vonesë, pa mundur që të kapë autorët.