E zëvendësoi në pjesën e dytë, Xabi Alonso i kërkon falje Guler-it

Real Madrid pësoi dje humbjen e parë të sezonit, në mënyrën më të hidhur të mundshme: 5-2 në derbin e qytetit ndaj Atletico Madridit. Megjithatë, një nga dritat e pakta për “Los Blancos” ishte Arda Guler. Ylli i ri turk dhuroi asistin për golin e parë dhe më pas shënoi vetë golin e dytë, duke i dhënë avantazh të përkohshëm madrilenëve.

Pavarësisht paraqitjes së shkëlqyer, në minutën e 60-të trajneri Xabi Alonso vendosi ta zëvendësonte me Franco Mastantuono, një vendim që befasoi të gjithë. Sipas mediave spanjolle, Alonso i ka kërkuar falje Gulerit pas ndeshjes, duke pranuar se vendimi i tij ishte i gabuar: “Ndoshta bëra një gabim dhe nuk duhej të të kisha hequr,” i ka thënë tekniku bask talentit turk.

Edhe pse luajti vetëm një orë lojë, Guler u vlerësua me notën 7.6, më i miri te Real Madrid. Ndryshe nga sezoni i kaluar, kur Carlo Ancelotti nuk e kishte titullar të rregullt, me mbërritjen e Xabi Alonso-s ai ka fituar vendin në formacion dhe ka treguar se mund të bëhet një pikë kyçe për madrilenët në këtë sezon.