Egbo: Nuk kemi frikë të themi se jemi për titull, me Laçin dua fitoren!

Trajneri i Tiranës, Emanuel Egbo doli në konferencë për shtyp mesditën e kësaj të shtune për të analizuar sfidën ndaj Laçit. Strategu nigerian është shprehur se nuk do të jetë aspak e thjeshtë ndaj kurbinasve.

“Nuk na hyn kjo në punë, e rëndësishme është Laçi dhe jo nëse kanë mungesa apo jo. Nuk shikoj ekipin kundërshtar, unë shikoj vetëm ekipin tim. Nëse futemi në fushë do të përpiqemi të marrim maksimumin. Tirana do të paraqitet si në të gjitha ndeshjet e tjera. Laçi është një ekip që duhet vlerësuar maksimalisht, sepse kanë ekip me organikë të mirë, jo më kot janë në vendin e tretë. Edhe Luftëtari me Flamurtarin që janë në fund nuk mund të quhen ekipe të lehta.

Janë edhe 11 javë për tu mbyllur kampionati, do vazhdojmë të marrim ndeshjet një nga një, duam të marrim maksimumin në çdo ndeshje.

Dhuratë nga Skënderbeu? Nuk merremi me ekipet e tjera, duhet të bëjmë punën tonë. Nuk na intereson se çfarë bëjnë të tjerët në shikojmë vetëm ndeshjet tona.

Momenti? Nuk ka ndryshuar shumë gjëra, ekipi ka marrë rezultatet pozitive, nuk është çudi që jemi në këtë pozitë që jemi. Me pikët që kemi marrë edhe ekipi ka marrë një lloj vetëbesimi. Ju bëni llogari  dhe analizë ndërsa ne i marrim ndeshjet një nga një.

Kemi shënuar gola dhe kemi pësuar pak, por ekipi ka krijuar një identitet dhe mentalitet fitues. Nuk kemi frikë të themi se jemi titull, por duhet të jemi me këmbë në tokë. Në fund do bëjmë llogaritë tona”, deklaroi Egbo.