Futbollisti i kombëtares shqiptare, Ernest Muçi, ishte protagonisti kryesor në fitoren spektakolare 4-3 të Trabzonsporit ndaj Rizesporit. Edhe pse nuk arriti të shënonte, fantazisti kuqezi dhuroi tri asiste dhe u bë lojtari i parë këtë sezon në Superligën turke që arrin një statistikë të tillë në një ndeshje të vetme.
Ernest Muçi po kalon një moment të shkëlqyer në futbollin turk. Sulmuesi shqiptar zhvilloi një paraqitje mbresëlënëse në përballjen mes Trabzonsporit dhe Rizesporit, ku skuadra e tij triumfoi me rezultatin 4-3.
Ndonëse emri i tij nuk u shfaq në listën e golashënuesve, Muçi ishte vendimtar për suksesin e Trabzonsporit, duke dhënë tri asiste për golat e skuadrës së tij. Një performancë që u vlerësua edhe nga mediat turke, të cilat i kushtuan vëmendje kontributit të futbollistit shqiptar.
Kontributi i fantazistit shqiptar nuk u kufizua vetëm te asistet. Sipas statistikave të publikuara për ndeshjen, ish-futbollisti i Tiranës regjistroi edhe katër pasime kyçe, ndërsa goditi dy herë në kuadrat nga tri tentativa gjithsej.
Muçi u dallua gjithashtu në duelet individuale, duke fituar nëntë nga 15 duelet e zhvilluara, një statistikë që përbën rekordin e tij personal që prej aktivizimit në futbollin turk.
Një tjetër tregues i ndikimit të tij në fazën sulmuese ishte fakti se e preku topin dhjetë herë brenda zonës kundërshtare. Ai pati gjithashtu sukses në tri nga katër tentativat për driblim.