Federata spanjolle telefonon Ademin: Kërkojmë ndjesë, ndeshja me Kosovën sipas rregullores!
Kosova po bëhet gati për ndeshjet eliminatore të Botërorit Katar 2022. Dardanët janë pjesë e grupit B, aty ku bëjnë pjesë edhe Spanja, Suedia, Greqia dhe Gjeorgjia. Djemtë e Challandes luajnë ndeshjen e parë në shtëpi kundër Suedisë (28 mars), teksa tre ditë më vonë udhëtojnë drejt Spanjës.
Sfida me skuadrën e Luis Enrique do të luhet në Sevilla, teksa një lajm i dalë në mediat iberike krijoi shqetësim të madh te Kosova. “Flamuri i Kosovës nuk do të jetë përkrah atij spanjoll në stadiumin andaluzian, teksa himni kombëtar i Kosovës do të prezantohet si muzika e dhuruar nga territori i Kosovës“, shkruante e përditshmja Marca.
Diçka e tillë lidhet me faktin që Spanja nuk e ka njohur akoma pavarësinë e Kosovës. Presidenti i FFK-së (Federata e Futbollit të Kosovës), Agim Ademi ka marrë gjatë ditës së sotme një telefonatë nga RFEF (Federata e Futbollit të Spanjës).
Këta të fundit kanë kërkua ndjesë në lidhje me lajmin e publikuar, teksa i kanë konfirmuar Ademit se ndeshja Spanjë-Kosovë do të zhvillohet konform rregulloreve dhe protokollit të FIFA-s dhe UEFA-s për ndeshjet zyrtare. Gjithashtu, RFEF ka shprehur mikpritjen e tyre për Kombëtaren e Kosovës dhe u tregua e hapur në bashkëpunim për çfarëdo nevoje që mund të ketë FFK-ja.
Ademi, i cili pati një komunikim edhe me zyrtarë të UEFA-s, shprehu respektin dhe besimin e tij ndaj Federatës së Futbollit të Spanjës dhe shprehu bindjen se do të zhvillohen dy ndeshje shumë të mira si në Sevilla, po ashtu edhe në Kosovë (8 shtator).
