FIFA mohon akuzat: Nuk po e shesim futbollin, vazhdon plani për investitorë privatë

FIFA ka reaguar ndaj kritikave të fundit, duke mohuar kategorikisht se synon të “shesë futbollin”. Përmes një deklarate zyrtare, institucioni më i lartë i futbollit botëror theksoi se raportimet e disa mediave kanë qenë të pasakta, ndërsa konfirmoi se do të vazhdojë me projektin për përfshirjen e investitorëve privatë në aktivitetet e saj tregtare.

Reagimi i FIFA-s vjen pas kundërshtimit të fortë nga UEFA, e cila ka paralajmëruar se mund të bojkotojë Kupën e Botës nëse reforma miratohet. Edhe CONCACAF, konfederata që përfaqëson federatat e Amerikës së Veriut, Qendrore dhe Karaibeve, ka refuzuar zyrtarisht planin e propozuar nga presidenti i FIFA-s, Gianni Infantino.

Për të siguruar miratimin e reformës, Infantino duhet të marrë mbështetjen e të paktën 106 prej 211 federatave anëtare të FIFA-s. UEFA dhe CONCACAF së bashku disponojnë 96 vota, duke përbërë një bllok vendimtar në procesin e votimit.

Në deklaratën e saj, FIFA thekson se debati është ndikuar nga “informacione të pasakta të shpërndara nga mediat” dhe garanton se procesi i konsultimit do të jetë i hapur dhe demokratik.

“Respektojmë shqetësimet e shprehura publikisht dhe mbetemi të përkushtuar që çdo federatë të votojë bazuar në fakte. Askush nuk po e shet futbollin. FIFA nuk do ta merrte kurrë në konsideratë një gjë të tillë”, thuhet në komunikatë.

Plani parashikon krijimin e kompanisë FIFA Forward Enterprise (FFE), një strukturë e re që do të menaxhojë aspektet tregtare të kompeticioneve kryesore të FIFA-s, përfshirë edhe Kupën e Botës. Sipas projektit, investitorëve privatë do t’u ofrohen vetëm aksione në pakicë, ndërsa kontrolli i plotë do të mbetet në duart e FIFA-s.

Sipas federatës ndërkombëtare, kjo nismë synon të rrisë të ardhurat dhe përfitimet për federatat kombëtare, pa cenuar qeverisjen dhe vlerat e futbollit. Megjithatë, UEFA vazhdon ta kundërshtojë ashpër projektin, duke akuzuar FIFA-n se po e përdor futbollin për të pasuruar veten dhe rrethin e saj të afërt.

Ndërkohë, mediat ndërkombëtare raportojnë se Infantino u ka premtuar federatave që do të mbështesin reformën një fond të jashtëzakonshëm prej 40 milionë dollarësh, me afat deri më 19 shtator për t’iu bashkuar projektit dhe për të përfituar këstin e parë prej 20 milionë dollarësh.

Nëse reforma miratohet, grupi i investitorëve pritet të udhëhiqet nga Thrive Eternal, kompani e lidhur me fondin amerikan të kapitalit sipërmarrës Thrive Capital, i themeluar nga Joshua Kushner, vëllai i Jared Kushner, dhëndrit të presidentit amerikan Donald Trump. Kjo lidhje ka shtuar më tej polemikat dhe dyshimet rreth transparencës së gjithë operacionit.