Fiorentina eliminon Atalantën në Kupën e Italisë, sfidon Interin në çerekfinale (VIDEO)

Fiorentina ka dhuruar një nga surprizat më të mëdha në Kupën e Italisë duke eliminuar Atalantën. Skuadra e Iachinit fitoi 2-1, edhe pse në minutat e fundit luajti me 10 futbollistë.

Ndeshja do të niste me gol për skuadrën vjollcë që zhbllokoi rezultatin që në minutën e 11-të. Pas një aksioni të bukur në krahun e majtë, Dalbert shërben në zonë për Cutronen, i cili e ka të thjeshtë për ta dërguar topin në rrjetë. Atalanta kërkon të reagojë, por e ka të vështirë gjetjen e hapësirave.

Trajneri Gasperini bën disa ndryshime në pjesën e dytë duke hedhur në fushë edhe sulmuesit titullarë si Ilicic dhe Gomez. Do të ishte slloveni, ai që do të vendoste baraspeshën në minutën e 67-të, pas një topi mjaft të mirë të Malinovsky-it nga krahu i majtë.

Fiorentina mori një tjetër goditje pas daljes me karton të kuq (dy të verdhë) të Pezzellas nga një simulim në zonë. Gjithsesi vendasit do të befasonin duke shënuar edhe golin e avantazhit dhe të kualifikimit me Lirolën. Në çerekfinale vjollcët do të sfidojnë Interin, që u kualifikua ndaj Cagliarit. /R.Lika-Koha Jone/