Fituan sfidat e para: Egnatia, Vllaznia dhe Dinamo synojnë kualifikimin në Conference League

Tri skuadrat shqiptare që përfaqësojnë vendin në raundin e dytë të UEFA Conference League do të zbresin në fushë nesër për ndeshjet e kthimit, me objektivin e qartë: kalimin në raundin tjetër. Egnatia, Vllaznia dhe Dinamo City vijnë pas fitoreve në sfidat e para dhe janë në pozicion shumë të favorshëm për të mbyllur me sukses këtë etapë.

Egnatia, që regjistroi një fitore mbresëlënëse 0-2 në transfertë ndaj Dinamo Minsk, do të luajë përballjen e kthimit në stadiumin “Arena Egnatia”. Ndeshja ndaj skuadrës bjelloruse do të zhvillohet sonte në orën 21:00, me rrogozhinasit që synojnë të konfirmojnë formën e mirë dhe të sigurojnë historikisht kalimin në turin tjetër.

Dinamo City, pas suksesit 1-2 në Andorrë ndaj AC Escaldes, do të kërkojë të mbyllë kualifikimin para tifozëve të vet në “Elbasan Arena”. Ndeshja do të luhet nga ora 20:45, dhe trajneri Daja shpreson në një tjetër paraqitje të qëndrueshme për të çuar skuadrën më tej në Evropë.

Vllaznia është e vetmja që do të luajë në transfertë, teksa do të përballet me Vikingur në Islandë. Shkodranët fituan 2-1 sfidën e parë në “Loro Boriçi” dhe kërkojnë të ruajnë avantazhin për të vazhduar rrugëtimin europian. Ndeshja në Reykjavik do të nisë në orën 20:45.

Të 3 ekipet shqiptare kanë në dorë fatin e tyre dhe janë vetëm një hap larg një suksesi tjetër në arenën ndërkombëtare.