Genoa këmbëngul për Kristjan Asllanin, De Rossi e kërkon në skuadër

E ardhmja e Kristjan Asllanit është në ditët vendimtare, teksa merkatoja e dimrit mbyllet më 1 shkurt. Që prej momentit kur Torino e nxori jashtë planeve për pjesën e mbetur të sezonit, mesfushori kuqezi është kthyer në një nga emrat më të përfolur, duke u lidhur pothuajse me çdo klub të Serie A që kërkon përforcime në mesfushë.

Interesimi për Asllanin nuk është kufizuar vetëm në Itali. Së fundmi u përfol edhe një pistë nga Turqia, ku Besiktas raportohet se ka kërkuar informacione zyrtare për një transferim të mundshëm.

Megjithatë, në ditët e fundit të merkatos, sipas mediave italiane, Genoa mbetet opsioni më konkret, pasi trajneri Daniele De Rossi ka shprehur pëlqimin e tij për mesfushorin dhe e konsideron një element të përshtatshëm për projektin e skuadrës.

Në këtë fazë, pengesa kryesore mbetet paga e lojtarit. Asllani nuk pranon ulje të kërkesave financiare, duke e bërë marrëveshjen më të vështirë për t’u finalizuar, pavarësisht interesimit dhe dëshirës së disa klubeve për ta afruar.