Gonçalo Ramos e ka të qartë objektivin e tij me Milanin. Sulmuesi portugez, i cili u transferua në “San Siro” gjatë merkatos së verës, nuk i fsheh ambiciet dhe kërkon që skuadra kuqezi të luftojë për titullin kampion.
“Për mua, sezoni do të jetë pozitiv nëse fitojmë titullin”, deklaroi Ramos në një intervistë për DAZN, duke treguar qartë se pritshmëritë e tij janë të mëdha, pavarësisht faktit se Milani nuk shihet mes favoritëve kryesorë për “titullin”.
Sulmuesi portugez foli edhe për shumën e paguar nga klubi për transferimin e tij, duke theksuar se kjo nuk është diçka që e shqetëson.
“Nuk mendoj se sa kanë paguar për mua. Nëse kanë shpenzuar kaq shumë, do të thotë se kanë besim tek unë. Mua më pëlqen presioni dhe dua të bëj diçka magjike për këtë klub”, u shpreh 26-vjeçari.
Misioni i Ramosit është i qartë: të shënojë gola. Ai e nisi aventurën në “San Siro” me gol ndaj Venezias, pasi kishte humbur disa raste përpara se të gjente rrugën e rrjetës.
Portugezi tregon se nuk dëshiron të mbetet peng i rasteve të humbura.
“Nëse mendon çdo herë për rastin që ke gabuar, nuk mund ta ndihmosh skuadrën dhe të shënosh golin tjetër. Besoj se jam një futbollist me eksperiencë dhe dua të sjell mentalitetin tim fitues te skuadra”, theksoi Ramos.
Një tjetër temë e diskutuar ishte edhe “mallkimi” i fanellës me numrin 9, që prej largimit të Olivier Giroud ka qenë një çështje e debatueshme te Milani. Ramos nuk duket aspak i shqetësuar nga kjo.
“Nuk mendoj për këtë. Për Giroud nuk ishte mallkim. Të veshësh numrin 9 është një nder, jo një problem”, tha sulmuesi.
Në fund, Ramos kujtoi edhe momentet e negociatave që çuan në transferimin e tij nga PSG te Milani. Ai zbuloi një telefonatë të rëndësishme nga trajneri Ruben Amorim.
“Amorim më telefonoi kur isha në Botëror dhe do ta kujtoj përgjithmonë. Por unë isha tashmë i bindur se doja të vija në Milano”, rrëfeu portugezi.