Guardiola thyen heshtjen për City-n: Jam më shumë se kurrë në krah të klubit!

Pep Guardiola ka reaguar për herë të parë pas vendimit të Premier League në lidhje me çështjen financiare të Manchester Cityt, duke shprehur mbështetjen e tij të plotë për klubin dhe drejtuesit e tij.

Trajneri spanjoll iu drejtua tifozëve të Manchester Cityt përmes një mesazhi, ku theksoi se do të qëndrojë pranë klubit edhe në këtë periudhë të vështirë.

“Dua që çdo tifoz i Manchester Cityt në të gjithë botën ta dijë se jam këtu, më shumë se kurrë. Kam qenë, jam dhe do të jem gjithmonë në krah të klubit tim, pronarit, presidentit Ferran, lojtarëve, stafit, Enzos dhe juve, tifozëve tanë unikë”, shkroi Guardiola.

Tekniku katalanas u shpreh i bindur se klubi do ta përballojë së bashku këtë situatë.

“Dua të jem i qartë: do t’ia dalim së bashku. Ju dua të gjithëve”, përfundoi Guardiola mesazhin e tij.

Guardiola ka qenë në krye të Manchester Cityt prej një dekade dhe gjatë kësaj periudhe ka fituar 17 trofe. Në mesin e tyre janë gjashtë tituj të Premier League dhe trofeu i Champions League, i pari në historinë e klubit.