Hyka drejt Beshiktash

Afrojne ditët e merkatos së janarit dhe legjionarët shqiptarë po lakohen në klube të ndryshme. Kështu sipas mediave zvicerane ndërkombëtari shqiptar Jahmir Hyka, mund të lëvizi drejt futbollit turk.

E përditshmja më e madhe në vend, “Blick”,shkruan se për futbollistin e Luzernës ka shfaqur interesim klubi i madh i Stambollit Beshiktash.

Këtë e konfirmon edhe drejtori sportiv i Luzernës, Remo Gaugler, i cili për “Blick” deklaroi: “Ne dëshirojmë t’i mbajmë të gjithë lojtarët në merkaton e dimrit, por nuk do të bëhemi pengesë për askënd nëse shohin mundësi më të mira sportive apo ekonomike”.

Mesfushorit të Kombëtares shqiptare i skadon kontrata në fund të këtij sezoni, ndaj klubi zviceran vështirë të bëhet pengesë nëse në drejtim të lojtarit vjen një ofertë e kënaqshme.

Jahmir Hyka ka shfaqur formë të mirë këtë sezon me Luzernën. Në 15 ndeshje të luajtura, 12 prej të cilave si titullar, ai ka shënuar gjashtë gola duke e ndihmuar ekipin të qëndrojë mes katër më të mirëve të ligës së parë zvicerane.