Hysaj pas fitores ndaj Serbisë: Një fitore që do të mbahet mend gjatë, dhamë gjithçka në fushë

Kapiteni dhe mbrojtësi i Kombëtares shqiptare, Elseid Hysaj, ka folur për Tv Klan pas fitores historike të kuqezinjve ndaj Serbisë me rezultatin minimal 0–1, duke e cilësuar këtë ndeshje si një nga më të rëndësishmet e karrierës së tij me fanellën kuqezi.

“Është një fitore që do të mbahet mend gjatë. Dhamë gjithçka në fushë, luftuam deri në minutën e fundit dhe treguam se kjo skuadër ka karakter dhe zemër të madhe. Jam krenar për djemtë dhe për gjithë Shqipërinë,”  tha Hysaj.

Mbrojtësi i Lazio-s shtoi se skuadra kishte ardhur e përgatitur për një ndeshje të fortë dhe se motivimi për të fituar ishte i jashtëzakonshëm: “E dinim që do të ishte një ndeshje e vështirë, por besuam deri në fund. Kur luan për flamurin, forca të vjen vetvetiu. Sot ia dolëm për veten, për tifozët dhe për çdo shqiptar.”

Hysaj, që barazoi rekordin e Lorik Canës me 93 ndeshje me Kombëtaren, e mbylli deklaratën me një mesazh emocionues: “Kjo fitore është për të gjithë shqiptarët kudo që janë. Kjo është Shqipëria, bashkë, e fortë dhe me zemër të madhe.”