Ndeshja me e dobët e Ronaldos me fanellën e Juventusit, përkoi dhe me sfidën më të mirë në karrierë për Gollinin, portierin e Atalantës, i cili i priti një penallti CR7-ës. Portugezi në fakt ka gabuar vetëm 26 herë nga pika e bardhë, ndërkohë që ka shënuar 133 herë me klubet dhe me kombëtaren ku është aktivizuar.
Duke kërkuar në Premier League, La Liga dhe Seria A janë 9 portieri që deri më tani kanë arritur që të ndalin Ronaldon. Një ndër ta është edhe Diego Alves, i cili në fakt i ka pritur 3 penallti.
Statistikat e Ronaldos kundër tij janë vërtet shumë negative. Në 4 penallti që ka goditur, 3 herë është ndalur nga Diego Aves. Episodi më i famshëm është ai në ndeshjen Real Madrid-Valencia, kur portieri shkoi për t’i thënë portugezit që të godiste në të djathtën e tij. Ronaldo goditi pikërisht në të djathtë të portierit dhe Diego Alves arriti që t’ia priste.
Një beteje psikologjike që e ka parë gjithmonë në vështirësi CR7. Tani për fatin e mirë të Ronaldos, Diego Alves luan në Brazil me Flamengon dhe vështirë se mund të përballen sërish me njëri-tjetrin. /R.Lika-Koha Jone/